Hér fyrir ofan sjáum við ljósmynd sem Magnús Ólafsson tók um 1910. Mennirnir á sundskýlunum eru Sigurjón Pétursson á Álafossi og Benedikt Waage. Myndirnar sem birtast hér eru allar eftir Magnús og sýna fólk í Reykjavík á árunum 1910-1920.
Stórmerkilegur myndabanki Magnúsar Ólafssonar er geymdur hjá Ljósmyndasafni Reykjavíkur. Safnið er eitt fjölmargra stofnana í heiminum sem hlaðið hefur inn merkilegum gömlum ljósmyndum hjá Commons-verkefninu hjá vefsíðunni Flickr.
Það er mikilvægt að söfn miðli gersemunum sem þau geyma og Lemúrinn fagnar í hvert skipti sem Ljósmyndasafn Reykjavíkur hleður inn myndum á netið fyrir almenning. Við minnum einnig á annað bráðskemmtilegt verkefni sama safns á netinu, Ljósmynd vikunnar.
Við hvetjum öll söfn og stofnanir landsins sem geyma ljósmyndir sem hafa sögulegt og menningarlegt gildi að gera þær aðgengilegar á stafrænu formi. Landmælingar Íslands er dæmi um opinbera stofnun sem nýlega fór þá leið.
Tíu konur, 1910-1920.
Tveir kraftakarlar hnykla vöðvana í Bárunni, 1910-1920.
Tvær konur við borð, 1910-1920.
Ungt fólk, ca 1910.
Á hestbaki í Vonarstræti um 1920.
Tveir drengir og hundur, ca 1920.
Tvær konur, 1910-1920.
Kaþólsk fermingarbörn, 1910-1920.
Enginn heima. 1910-1930, setustofa á heimili Sigurjóns snikkara og Elínar konu hans að Vonarstræti 8.
Hákarl liggur í fjörunni fyrir vestan Slippinn í Reykjavík, sennilega 6. ágúst 1915.
Hljómsveit Oscars Johansens í Bárunni, sennilega 1912.
1900-1913, tvær telpur sitja á girðingu. Í baksýn Alþingishúsið og Dómkirkjan.
„Veturinn 1913-1914, leikfimi drengja í íþróttasal barnaskólans í Reykjavík. Ýmis áhöld til íþróttaiðkunar, hestur, kista, þverslá, rimlar, kaðlar og hringir í loftinu. Upp við vegginn er ofn til upphitunar og á veggnum eru teikningar sem sýna leikfimisæfingar, gætu verið svokallaðar Mullers-æfingar.“
„1914, fimleikastúlkur og þjálfari þeirra Björn Jakobsson, sennilega á Melavelli. Kveníþróttafélagið Iðunn.“
„1920-1927, portrett, augnabliksmynd. Gamall maður í rétt, heldur í horn á hrúti. Jón Torfason (1855-1928) útvegsbóndi frá Hákonarbæ, Mjóstræti 10.“
