Wikipedia á íslensku hefur verið til í 10 ár. Í tilefni þess voru á dögunum birtar fjölmargar ljósmyndir frá einum frægasta mótmælafundi Íslandssögunnar. Árið 1949 sam­þykkti rík­is­stjórn Stefáns Jóhanns Stefánssonar aðild Íslands að Norður-​​Atlantshafsbandalaginu. Ákvörð­unin var mjög umdeild á sínum tíma, og fjöldi manns safn­að­ist saman við Austurvöll þann 30. mars í mót­mæla­skyni. Eins og frægt er, kom til harð­vítugra átaka milli and­stæð­inga samn­ings­ins, lög­reglu og stuðn­ings­manna aðildar.

Lemúrinn hefur áður birt myndir frá mótmælunum, en Valgerður Tryggvadóttir tók magnaðar ljósmyndir á þessum sögulega degi sem sjá má hér.

Ljósmyndirnar sem við sjáum hér voru teknar 30. og 31. mars 1949. Þeim hefur verið hlaðið  á vef Wikimedia Commons. Myndirnar voru teknar af óþekktum lögreglumönnum og fengnar annars vegar frá Þjóðskjalasafninu og hins vegar Lögreglunni á Suðurnesjum.

„Áflogasveit frá Keflavíkurflugvelli undir stjórn Lárusar Salómonssonar gengur á Austurvöll 30. mars 1949. Frá vinstri: Óli „Norski“ (var frá Sauðárkrók), Lárus Salómonsson, Sigurður Sigurðsson, fyrir aftan þá eru lögreglumennirnir Benedikt Þórarinsson, Þórarinn Fjelsted, Bjarni Gíslason og Lúðvík Jónsson.“

Bjarni Benediktsson, skýrir þjóðinni frá undirritun varnarsáttmálans og inngöngu Íslands í NATO 1949. Pétur Pétursson þulur við upptökutækin.

Talið er að um 8–10 þúsund manns hafi verið á Austurvelli þennan dag. Átökin voru hörð og þeim lauk ekki fyrr en lög­reglan dreifði tára­gasi um þetta ann­ars frið­sæla torg í hjarta Reykjavíkur.

Skrif dag­blað­anna í kjöl­far atburð­anna bera glöggt vitni um and­stæð­urnar í íslenskum stjórn­málum á þeim tíma. Þjóðviljinn sagði að ákvörðun Alþingis hefði verið tekin „í skjóli ofbeldis og villimann­legra árása á frið­sama alþýðu“ og kall­aði þá sem sam­þykktu aðild að NATO Bandaríkjaleppa. Morgunblaðið spar­aði heldur ekki stóru orðin og sagði að „trylltur skríll hefði ráð­ist á Alþingi“.