Konungur sænska skógarins, elgurinn, er tilkomumikið dýr. Hann er bæði háfættur og tignarlegur en einnig stórhættulegur. Argur elgur getur léttilega orðið fullvaxta manneskju að bana.

Í september árið 2008 fannst Agneta Westlund látin við vatnið Frisksjön í Loftahammar í Svíþjóð. Bar lík hennar þess merki að hafa verið beitt miklu afli og beindust sjónir lögreglunnar nánast samstundis að eiginmanni Agnetu, Ingemar Westlund.

Tilgáta rannsóknarlögreglumanna var sú að Ingemar hefði gengið í skrokk á eiginkonu sinni, ekið yfir hana á traktor og síðan flutt líkið frá heimili þeirra. Ingemar sat í gæsluvarðhaldi í samtals fimm mánuði á meðan á rannsókn málsins stóð og neitaði allan tímann sök.

Við rannsóknir á lífssýnum sem fundust á Agnetu tók rannsókn málsins skyndilega nýja og furðulega stefnu. Á henni fundust leifar munnvatns sem reyndist að öllum líkindum vera frá þeim sem bar ábyrgð á dauða hennar. Voru þau lífssýni ekki frá eiginmanni hennar komin heldur sjálfum konungi skógarins, elg.

Agneta Westland.

Frétt um málið og mynd af Ingmar við gröf eiginkonunnar.

Fyrst um sinn var lögreglan efins um að nokkuð dýr í Svíþjóð gæti veitt manneskju svona mikla áverka. Við rannsóknir á því barst lögreglunni myndband sem sýnir svo ekki sé um villst að elgir eru fullfærir um að bana fullorðinni manneskju.

Í myndbandinu gefur að líta elgskú með kálf sem ræðst að manni og slær hann niður með framfótunum og traðkar síðan á honum.

Málið hefur vakið mikla athygli og í sjónvarpsþættinum Veckans Brott gagnrýndi afbrotafræðingurinn frægi Leif GW Persson lögregluna harkalega fyrir slæleg vinnubrögð. Í viðtali Västerviks Tidningen gagnrýnir eiginmaður Agnetu lögregluna einnig og segir að reynt hafi verið að gera hvað sem er til að skella skuldinni á hann.

Hér er myndband hjá Expressen af árás elgsins sem sannfærði lögreglu um sakleysi Ingemars.