Rothschild-fjölskyldan er líklega ríkasta fjölskylda í heimi. Margir telja hana jafnvel svo ríka og volduga að hún stjórni í raun öllu sem hún stjórna vill, nema aðeins á bak við tjöldin.
Meðlimir Rothschild-fjölskyldunnar hafa í gegnum tíðina hangið með jafnt kóngafólki sem kvikmyndastjörnum og er mál manna að sæmilegt partý hjá Rothschild-fjölskyldunni sé líklega besta partý sem hvaða meðalmaður á eftir að sækja á lífsleiðinni.
Þann 12. desember árið 1972 bauð Marie-Hélène de Rothschild, eiginkona helsta erfingja Frakklandsarms Rothschild-veldisins Guy de Rothschild, til kvöldverðarboðs sem var einkar metnaðarfullt. Í Dîner de Têtes Surréaliste, eða kvöldverði súrrealísku höfðanna, kom fínasta og ríkasta fólk Parísarborgar. Og Salvador Dali var lykilmaður. Auðvitað!
Myndirnar af viðburðinum eru magnaðar!

Boðskortið var skrifað aftur á bak. Samsæriskenningarsmiðir hreinlega froðufella við tilhugsunina um allar satanísku tengingarnar sem það hefur í för með sér.

Matseðillinn er frekar súr. Þar er meðal annars að finna „Söguframvindu yndislegra líkamsleifa,“ „Geðveik hnýði“ og „ferskjur og geitaost sem öskra af sorg.“

Gestgjafarnir Guy og Marie-Hélène de Rothschild. Marie er með hjartarhöfuð, sem grætur demantstárum. Líklega satanískt tákn.

Marie-Hélène ásamt Baron Alexis de Redé, sem gekk með sérsmíðaða margandlita grímu. Andlitin eru byggð á verkinu La Jaconde, eða Monu Lisu. Höfundurinn var enginn annar en Salvador Dali.

Magnaðar grímur, sú til vinstri minnir um margt á „ávaxtalistaverk“ Guiseppe Arcimboldo – sem lemúrinn hefur fjallað um.

Ferriéres-kastali Rothschild-fjölskyldunnar í útverfi Parísar var baðaður rauðum og appelsínugulum hreyfanlegum ljósum – til að búa til þau hughrif að kastalinn stæði í ljósum logum.

Barónessan af Thyssen-Bornemizza með tvö höfuð ásamt Guy Baguenault de Puchesse, ekki Robert Redford því miður.