Lemúrinn sagði nýlega sögur af franska fjölbragðaglímumanninum og leikaranum André the Giant, sem þekktur er fyrir leik sinn í költmyndinni The Princess Bride frá 1987 og fyrir að hafa verið einn afkastamesti bjórdrykkjumaður sögunnar. En André þessi Rousimoff tengist afmælisbarni dagsins, írska nóbelsverðlaunahafanum Samuel Beckett.

Leikskáldið Beckett keypti landskika í útjaðri Parísar á sjötta áratugnum og byggði sér þar lítið býli með aðstoð nokkurra íbúa í nálægum smábæ. Einn þeirra sem hjálpuðu Beckett var bóndi af búlgörskum ættum, Boris Rousimoff, sem var pabbi André. Beckett og Boris ræktuðu með sér vinskap og spiluðu stundum spil á síðkvöldum.

Á þeim tíma var André greyið farinn að þjást og finna fyrir þeirri hormónabilun er leiddi til risavaxtar hans. Þegar pilturinn var 12 ára var hann 190 cm á hæð og vó 110 kg og komst ekki lengur fyrir í litla skólabílnum þarna í smábænum. Þegar Beckett frétti af þessum vandræðum fjölskyldunnar bauðst hann til að skutla André í skólann, enda átti skáldið rúmgóðan jeppa og gæti þannig endurgoldið Boris hjálpina við húsbygginguna.

Og saman ferðuðust þeir því, Samuel Beckett og André risi, saman á hverjum degi og töluðu um krikket, eftir því sem sá síðarnefndi talaði um síðar.