Óþekktur Íslendingur les áróðursskilaboð frá útvarpi Þriðja ríkisins 10. desember 1944. Nasistar fluttu áróður á ýmsum tungumálum með útvarpsbylgjum sínum og voru skilaboð flutt á íslensku um nokkurt skeið.
Útsendingar byrjuðu svona: „Hér er Berlín! Hér er Berlín! Þýskaland útvarpar daglega á íslensku frá kl. 1745 til 18 samkvæmt íslenskum tíma.“
Upptakan er fengin af vef RÚV, en á sérstakri síðu um hernámið og stríðsárin er umfjöllun um útsendingar Þjóðverja á íslensku á stríðsárunum.
Ljósmyndin er af nasistafána við hús Sigurðar Hlíðar, ræðismanns Þjóðverja á Akureyri um 1938. Myndina tók Eðvarð Sigurgeirsson ljósmyndari.
Morgunblaðið segir svo frá upphafi þessara útsendinga miðvikudaginn 18. júní árið 1941:
Klukkan 6:45 í gærkvöldi hófst útvarp á íslensku frá Þýskalandi.Var útvarpað á stuttbylgjum, öldulengd 19.Flutt var erindi um Jón Sigurðsson forseta. Íslendingurinn sem talaði í útvarpið sagði að ráðgert væri að hefja daglegt útvarp frá Þýskalandi til Íslands og væri ætlast til að útvarp þetta gæti orðið tengiliður milli Þýskalands og Íslands. Þótt fjarlægðin á milli landanna væri mikil, þá bærist þó jafnan frjettir á milli landanna.Voru Íslendingar hvattir til þess að fylgjast vel með „nýbyggingu hinnar hrörnandi Evrópu“ sem nú ætti sér stað. Útvarpsþulurinn skýrði frá því að næst yrði útvarpað á Íslensku næstkomandi þriðjudag, 24. júní kl. 17:45 á sömu öldulengd 19 metrum. Útvarpinu lauk með því að íslenski þjóðsöngurinn var leikinn.
Tengdar greinar:
