Þungarokkarar í Botsvana sýna klærnar

Í sunnanverðri Afríku hlusta sumir á þungarokk og klæða sig í vígalega búninga. Ljósmyndarinn Frank Marshall hefur gert sýningu um þennan forvitnilega menningarkima.

Ísland, Grænland og Ástralía eru dæmi um lönd sem skipa listann yfir strjálbýlustu lönd heims. Á þeim lista er líka að finna Afríkulandið Botsvana. Um tvær milljónir manna búa þar í víðáttumiklu landi sem Kalahari-eyðimörkin þekur. Inni á milli eru stórar demantanámur en aðaliðnaður Botsvana byggist á því heimsins harðasta efni.

Í höfuðborginni Gaborone, sem sumir kannast svolítið við úr bókum Alexander McCall Smith um Kvenspæjarastofu númer 1, má finna mikla þungarokksaðdáendur sem Suður-Afríkumaðurinn Marshall hefur myndað.

„Það er samkeppni um vígalegasta útlitið,“ segir Marshall um þennan menningarkima. Hann telur að þungmálmahreyfing Botsvana snúist um annað og meira en rokktónlistina því hún sé í raun í uppreisn gegn ríkjandi gildum og hugmyndum í landinu.

Fræðist meira um málið á vefsíðu sýningarinnar. Við minnum einnig á eldri grein á Lemúrnum sem fjallaði um annan afrískan menningarkima, herramenn í Kongó.