Kvikmyndin Barry Lyndon frá árinu 1975 er eitt af mörgum frábærum sköpunarverkum leikstjórans Stanley Kubrick. Hún er byggð á skáldsögu Williams Thackeray, The Luck of Barry Lyndon, og segir raunasögu ungs ævintýramanns á miðri 18. öld.

Við gerð myndarinnar notaði Kubrick nær eingöngu náttúrulega lýsingu. Upptökur fóru fram með sérlega ljósnæmum linsum sem þróaðar höfðu verið af geimvísindastofnuninni NASA fyrir Apollo tunglförin. Útkoman er ein fegursta kvikmynd sögunnar — mörg eftirminnileg atriði gætu allt eins verið málverk frá 18. öld.