„Ég hef elskað upp­reisn­ar­mann­inn í þér, hann hefur alltaf verið mér hvatn­ing, en ég er ekki hrif­inn af geislabaug­unum, ég mun ekki biðja fyrir þér“

Svo skrif­aði sádi­ar­ab­íski blaða­mað­ur­inn Hamza Kashgari á Twitter 3. febrúar síð­ast­lið­inn, á afmæl­is­degi Múhameðs spá­manns. Kashgari, sem er 23 ára gam­all, skrif­aði alls þrjú ‘tvít’ sem hann beindi til afmæl­is­barns dagsins.

Í öðru skrif­aði hann: „Ég mun ekki kyssa hönd þína, heldur taka í hana eins og jafn­ingjar gera […] og ávarpa þig sem vin, ekki meir“.

Twitterskrifin vöktu strax hörð við­brögð — Kashgari barst 30.000 mótsvör frá guð­hræddum löndum sínum á sam­skipt­a­síð­unni, þar sem honum var meðal ann­ars hótað líf­láti og öllu illu fyrir að hafa móðgað spá­mann­inn. Hann eyddi tví­t­unum og baðst afsök­unar, en það sljákk­aði ekki reiði hinna trú­uðu. Að lokum flúði hann land til Malasíu. Stjórnvöld þar fram­seldu hann aftur til Sádi-​​Arabíu í morgun.

Hvað bíður Kashghri heima fyrir? Dauðarefsing liggur við guðlasti í Sádi-​​Arabíu, og háværar raddir í sádi­ar­ab­ísku sam­fé­lagi fara nú fram á að Kashgari hljóti þá refs­ingu. Meðal þeirra er klerk­ur­inn sjeik Nasser Al Omar, í vídjó­inu hér að ofan. Hann var svo miður sín vegna þess­arar grófu móðg­unar við spá­mann­inn að hann fór að hágráta í miðri predikun.

Hamza Kashgari, blogg­ari og pistla­höf­undur hjá dag­blað­inu Al-​​bilad í Jeddah.